Астанада «Таза Қазақстан» жобасы аясында бөтелкелер мен банкалар жинайтын фандоматтардың жұмысы таныстырылды

Астанада «Таза Қазақстан» бастамасы аясында пластикалық бөтелкелер мен алюминий банкаларды жинап, қайта өңдеуге арналған «Sparklo» фандоматтар желісі таныстырылды деп хабарлайды елорда әкімдігінің ресми сайты.

Жоба экологиялық мәдениетті дамыту тұжырымдамасы «Таза Қазақстан» аясында «Zero Waste» компаниясымен бірге жүзеге асырылып, ҚР Экология және табиғи ресурстар министрлігі мен «Жасыл даму» АҚ-ның қолдауымен іске қосылды.

Іс-шара барысында фандоматтардың жұмысы, екінші реттік шикізатты қабылдау автоматтандырылған жүйесі, сондай-ақ халықты қалдықтарды бөлек жинауға тартудың әдістері көрсетілді.

«Біздің жобамыздың сұранысқа ие болуы қуантады. Тек Астанада ғана біз 2 миллионнан астам бөтелке мен банка жинадық. Ал бүкіл ел бойынша өңдеуге бағытталған өнім көлемі 5 миллионнан асты. Бағдарламаның ерекшелігі — халықты ынталандыру жүйесі. Қайтарылған шикізат үшін пайдаланушылар мобильді қосымшада сыйақыларға немесе серіктестердің бонустарына айырбастауға болатын ұпай алады», — деп мәлімдеді «Sparklo Kazakhstan» компаниясының бас директоры Татьяна Ашрафзянова.

Оның айтуынша, жобаға балалар да қызығушылық танытуда. Ата-аналар фандоматтарға балаларымен бірге келіп, тұрмыста қалдықтарды сорттаудың маңыздылығын үйретеді. Бұл өз кезегінде экологиялық жауапкершілікті ерте жастан бастап қалыптастыруға ықпал етеді.

Бүгінгі таңда Қазақстанда 53 фандомат орнатылған. Жоба қатысушыларының саны 100 мыңнан асты. Астанада фандоматтар желісі кезең-кезеңімен кеңейтілуде.

Жобаның негізгі мақсаты — қалдықтарды шаруашылық айналымға қайтару, екінші реттік шикізатты тиімді пайдалану, бөлек жинау инфрақұрылымын дамыту және тұрақты қайта өңдеу жүйесін құру. Мамандардың пікірінше, мұндай бастамалар қоқыс көлемін азайту мүмкіндігін ғана емес, сонымен қатар тұрғындардың табиғатқа деген жауапкершілігін арттырады. Пластикалық бөтелкелер мен алюминий банкаларды арнайы құрылғыларға тапсыру арқылы әрбір адам қоршаған ортаны қорғауға өз үлесін қоса алады.

деп хабарлайды ЖКХ24 Астана қаласы Әкімдігінің ресми сайтына сілтеме жасап.

Фото: gov.kz