Қазақстанда құрылыс компанияларын цифрлық бақылау енгізілуде

Елімізде құрылыс компанияларын цифрлық бақылау жүйесінің енгізіліп жатқаны туралы ақпарат белгілі болды. Бұл туралы Мемлекет басшысы Қазақстан халқына Жолдауда айтты, онда ел дамуының басты басымдықтарының бірі ретінде ауқымды құрылыс пен инфрақұрылымды жаңарту атап көрсетілген.

2027 жылға қарай Қазақстан үлкен құрылыс алаңына айналуы тиіс, мұнда жаңа нысандар тұрғызылып, халықтың өмір сүру жағдайлары жақсартылады.

Осы ауқымды жобаларды сәтті жүзеге асыру үшін білікті мамандарға, қажетті техникаға және жұмыс тәжірибесіне ие сенімді құрылыс және жобалау ұйымдары қажет. Бүгінде Қазақстанда құрылыс саласында шамамен 80 мың лицензия тіркелген. Алайда, лицензияның болуы компанияның жұмыстарды сапалы орындауға қажетті ресурстары бар екендігін әрдайым қамтамасыз етпейді.

Осыған байланысты «Атамекен» ҰКП алаңында Палатаның және оның өңірлік филиалдарының өкілдері, сондай-ақ құрылыс саласындағы салалық бірлестіктер бас қосқан кездесу өтті. Кездесуде Қазақстан Республикасы Индустрия және құрылыс министрлігі Құрылыс және тұрғын үй-коммуналдық шаруашылық істері комитеті төрағасының орынбасары Мұрат Рысдәулейтов құрылыс саласындағы лицензиаттарға цифрлық бақылау механизмін — Автоматтандырылған лицензиаттар реестерін (ары қарай — Реестр) таныстырды.

Реестрдің басты міндеті — лицензия иелерінің біліктілік талаптарын қолданыстағы заңнама шеңберінде үнемі сақтауын қамтамасыз ету. Автоматтандырылған реестр құрылыс және жобалау ұйымдарының белгіленген біліктілік талаптарына сәйкестігін сандық жүйелердің деректерін негізге ала отырып мониторинг жасауға мүмкіндік береді, мұнда білікті мамандардың және қажетті өндірістік базаның бар-жоғы есепке алынады.

Бұл тәжірибеде тапсырыс берушілердің құрылыс және жобалау ұйымдарының сенімділігін бағалау тәсілін өзгертеді. Мердігерді таңдауда лицензияның болуы ғана емес, сонымен бірге компанияның шынайы мүмкіндіктері, тәжірибесі және жұмыстарының нәтижелері де ескерілетін болады. Адал ұйымдар үшін бұл құрылыс жобаларына қатысуда айқын әрі тең жағдайлар жасайды.

Реестрді енгізу құрылыс нарығының айқындығын арттыруға, сапасыз құрылыс тәуекелдерін азайтуға және нысандарды уақытында пайдалануға берілуін қамтамасыз етуге бағытталған. Соңғы нәтижесінде Реестр сандық шешімдер арқылы компаниялардың тәжірибесі мен әлеуетін объективті бағалауға мүмкіндік береді.

Жүйенің тестілік іске қосылуы осы жылдың қарашасына жоспарланған.

деп жазады Тұрғын үй-коммуналдық шаруашылық 24 Комитеттің сайтына сілтеме жасай отырып.

Фото: gov.kz