Алматы облысында 1 трлн теңгеден астам сомада ҚХР-пен 24 келісімшартқа қол қойылды

Бүгін Қытайда Алматы облысы мен Шэньси провинциясы арасында Қазақстан Республикасының Сиянь қаласындағы Бас консулдығы ұйымдастырған сауда-экономикалық форум өтті, деп хабарлайды Алматы облысы әкімінің баспасөз қызметі.

Форум барысында Алматы облысы делегациясы Марат Сұлтанғазиевтің басшылығымен қытайлық компаниялармен 24 меморандумға қол қойды. Тараптар инновациялық жобаларды талқылап, өзара сенім мен құрметке негізделген келіссөздер жүргізді. Нәтижесінде, көлік логистикасы, ауыл шаруашылығы, құрылыс, биотехнология және IT салаларындағы жалпы құны 1 трлн теңгеден асатын бизнес-жобалардың тізімі жасалды.

Марат Сұлтанғазиев, Қазақстан Республикасының Президенті Қасым-Жомарт Тоқаевтың сөзіне сілтеме жасай отырып, Қазақстан серіктестік пен инвестицияларға ашық екенін атап өтті.

«Бүгінгі таңда біз аймаққа сенім білдіріп, маңызды жобаларды іске асыратын ірі халықаралық инвесторлармен ынтымақтастықта істейміз. Қытай - біздің ең ірі сауда серіктесіміз, көршіміз және көпғасырлық досымыз. Алматы облысы Қытай Халық Республикасымен тікелей шекаралас. Бұл сауда, логистика, өнеркәсіп және трансшекаралық жобалар үшін қолайлы жағдай жасайды. Сондықтан біз осы форумды өткізіп отырмыз», - деп атап өтті облыс әкімі.

Марат Сұлтанғазиев, сондай-ақ, Алматы облысының динамикалық дамуын атап өтіп, бұл инвесторлар сенімінің жоғары деңгейін қамтамасыз ететінін айтты. Ол аймақта жалпы құны 7,9 трлн теңгені құрайтын 259 инвестициялық жобаның жүзеге асырылып жатқанын, олар 155 мыңнан астам тұрақты жұмыс орындарын ашатынын хабарлады. Шетелдік инвесторлардың қатысуымен жалпы құны 4,5 трлн теңгені құрайтын 73 жоба жүзеге асырылып жатыр, жоспарланған жұмыс орындарының саны 65 мыңнан асады.

Соңғы үш жылда Алматы облысы мен Қытай арасындағы тауар айналымы 1 млрд АҚШ долларынан асты, ал аймақта қытайлық капиталдың қатысуымен 143 кәсіпорын қызмет атқарады.

Форумда жаңа Алатау қаласын салуға да көңіл бөлініп, ол Марат Сұлтанғазиевтің айтуынша, аймақтың дамуына серпін беріп, өмір сүруге және бизнес жүргізуге қолайлы орта жасайтын болады.

«Инвестициялар – бұл тек капитал емес, бұл сенім мен шынайы серіктестіктің көрінісі. Сондықтан Алматы облысында жұмыс істейтін шетелдік компаниялар аймақтың әлеуетін көріп, ұзақмерзімді және бірегей жобаларды іске асыруда», - деп қосты ол.

ҚХР-мен әрі қарай ынтымақтастық жасау аясында Алматы облысының дамуына елеулі үлес қосатын ірі инвестициялық жобаларды жүзеге асыру және жаңа көкжиектерді ашу қарастырылған.

ЖКХ24 Алматы облысы Тұрғын үй-коммуналдық шаруашылық және абаттандыру басқармасының сайтына сілтеме жасап хабарлайды.

Фото: gov.kz