Ақтөбеде түрік компанияларымен әріптестікті талқылады

Ақтөбеде облыс әкімі Асхат Шахаровтың B. ERGÜNLER, OYTAŞ және "Omer-S" ЖШС компанияларының өкілдерімен кездесуі өтті. Тараптар жол құрылысы, инженерлік инфрақұрылымды дамыту және өнеркәсіптік жобаларды іске асыру саласындағы ынтымақтастықтың келешегін талқылады.

Кездесу барысында аймақ басшысы Қазақстан мен Түркия арасындағы байланыстарды нығайтып, халықаралық тәжірибелі компанияларды облыстың инфрақұрылымдық және өндірістік әлеуетін дамытуға тартудың маңыздылығын атап өтті.

«Қазақстан мен Түркияны көптеген жылдарға созылған достық, өзара сенім және стратегиялық серіктестік қатынастар біріктіріп отыр. Біздің елдеріміз арасындағы ынтымақтастықтың ерекше маңызы бар және сауда-экономикалық және инвестициялық байланыстарды дамытудың кең мүмкіндіктерін ашады. Біз түрік компанияларының тәжірибесін жоғары бағалаймыз және іскерлік ынтымақтастықты одан әрі нығайтуға мүдделіміз. Ақтөбе облысы үшін басым міндет – жол және инженерлік инфрақұрылымды жаңарту, өнеркәсіптік әлеуетті арттыру және жаңа инвестициялық бастамаларды іске асыру. Сіздің компанияларыңыздың кәсіби тәжірибесі мен техникалық мүмкіндіктері өзара тиімді ынтымақтастықтың және біздің аймақта нақты жобаларды іске асырудың негізі болатынына сенімдімін»,

– деп атап өтті Асхат Шахаров.

Кездесу қатысушылары өз компанияларының тәжірибесі мен құзыреттерін таныстырды.

1994 жылы Бурса қаласында іргесі қаланған түрік B. ERGÜNLER компаниясы автомобиль және темір жолдар, көпірлер, туннельдер және энергетикалық нысандар салуда 30 жылдан астам тәжірибеге ие. Оның қатысуымен Анкара – Сивас теміржолы мен жаңартылатын энергия нысандарының жобалары жүзеге асырылды.

2014 жылы Ыстамбұлда іргесі қаланған OYTAŞ компаниясы жол-көлік, өнеркәсіптік және энергетикалық құрылыс саласына маманданған. Оның құзіреттерінің қатарында – автомобиль жолдары, көлік айырықтары және гидроэнергетикалық нысандарды салу бар.

Түрік компанияларының қазақстандық серіктесі ретінде жол-құрылыс жұмыстарын атқару, инженерлік желілерді төсеу және құрылыс-монтаждау жұмыстарында тәжірибесі бар "Omer-S" ЖШС танылған. Компаниялар Ақтөбе облысы аумағында жобаларға бірлесіп қатысуға ниетті.

Келіссөздер барысында сондай-ақ өзара іс-қимылдың ықтимал механизмдері, соның ішінде мердігерлік жұмыстарға қатысу, бірлескен кәсіпорындар мен консорциумдар құру, сондай-ақ мемлекеттік-жекеменшік әріптестік аясында жобаларды іске асыру қаралды.

деп хабарлайды "ЖКХ24" Ақтөбе облысының энергетика және тұрғын үй-коммуналдық шаруашылық басқармасының сайтына сілтеме жасап.

Фото: gov.kz