Алматыда Қала күніне орай алғашқы гастрономия көшесі ашылады

20 қыркүйекте Алматыда, Қала күніне орай, алғашқы гастрономия көшесі — Масанчи көшесі, Сәтпаев даңғылынан Абай даңғылына дейін ашылады.

Масанчи гастрономия көшесін құру жобасы Алматыда арнайы гастрономиялық көшелер (гастрокөшелер) желісін қалыптастыру жобасы аясында іске асуда. Жоба қаланың экономикасын, туризмін, шағын және орта бизнесті дамытуға, сондай-ақ заманауи қоғамдық кеңістіктер жасауға бағытталған.

Гастрокөшелер концепциясы халықаралық тәжірибеге негізделген, онда гастрономия, мәдениет, кәсіпкерлік және көріктендірудің үйлесімі қалалық орта қалыптастырады.

Мұндай кеңістіктер жергілікті бизнестің дамуына ықпал етеді, көшелердің тартымдылығын арттырады, және тұрғындардың демалу мен қарым-қатынас жасауына жағдай жасайды.

Жоба кеңістіктерді бірыңғай сәулеттік стильмен және гастрономиялық инфрақұрылымды дамыту арқылы кешенді өзгерістерді көздейді. Бұл ретте объектілердің кемінде 60%-ын қоғамдық тамақтандыру орындары, ал 40%-ға дейінгісін – гүл дүкендері, қолөнер шеберханалары, кітап дүкендері, галереялар және гастрокөшенің концепциясын қолдайтын басқа да қызмет түрлері құрайды.

Масанчи көшесі осы бағытта алғашқы іске асырылған кеңістікке айналады. Ұзындығы 413 метрлік аумақта жартылай жаяу жүргінші аймағы, кеңейтілген тротуарлар, көгалдандыру, велосипед жолы және мекемелердің жазғы террасаларымен заманауи қалалық орта жасалды.

Көріктендіру барысында жабындар мен қалалық инфрақұрылым элементтері жаңартылды, кедергісіз орта қалыптастырылды, жаңа жарықтандыру, орындықтар және қоқыс жәшіктері орнатылды. Аумақ жасыл екпелермен, өнер нысандарымен және шағын сәулет формаларымен толықтырылды. Сондай-ақ ғимараттарды «фасадтан фасадқа дейін» қағидаты бойынша қайта жөндеу жұмыстары жүргізілді.

Масанчи көшесінің концепциясы музыка және қалалық мәдениетке баса назар аудара отырып, жастарға бағытталған гастрокөшені құруды көздейді. Тақырыптық сілтемелердің бірі ҚазПТИ-дің студенттері болған аңызға айналған «Дос-Мұқасан» тобы болмақ.

Барлығы аумақта 26 нысан орналасқан, оның 16-сы — жұмыс істеп тұрған және жоспарланған қоғамдық тамақтандыру орындары. Олардың арасында Bal, Tary, The Point мейрамханалары да бар. Қазіргі уақытта мекемелерде жөндеу жұмыстары жүргізілуде, олар аяқталғаннан кейін кезең-кезеңімен ашылады.

Алматыда гастрономиялық көшелер желісінің дамуы қосымша қоғамдық тамақтандыру орындарын, шағын және орта бизнес пен заманауи қоғамдық кеңістіктерді біріктірумен жалғасын табады.

деп хабарлайды ТКШ24 Алматы қаласының Әкімдігі сайтынан алынған дерекке сілтеме жасап.

Фото: gov.kz