Жетісу облысында білім беру және медицина мекемелері жылыту маусымына толық дайын

Жетісу өңірінде алдағы жылыту маусымына дайындық жүруде. Атап айтқанда, білім беру және медицина нысандары 100% дайын, ал көпқабатты тұрғын үйлер – 98% дайын күйде, деп хабарлайды Жетісу облысы әкімі баспасөз қызметі.

Жаңа жылыту маусымына дайындық аясында өңірде жылу жүйелерін жөндеу және жаңғырту, инженерлік желілерді дайындау, қажетті отын қорларын жасау, сонымен қатар тұрғын үйлер мен әлеуметтік сала нысандарын дайындау жұмыстары жүргізілуде.

Облыстық энергетика және тұрғын үй-коммуналдық шаруашылығы басқармасының мәліметтері бойынша, өңірде екі турбина мен 15 қазандықта жөндеу жұмыстары жүргізілуде. Жоспарланған 10,4 км жылу жүйесінің 6,9 км қалпына келтірілді. Жоспарланған 55,6 км су құбырларында жұмыстар толық аяқталды. 558 км электр желілері мен 52 трансформаторлық қосалқы станцияларда жөндеу жұмыстары жүруде.

Ұлттық жоба аясында Талдықорғанда 4,9 км жылу жүйесін жаңғырту көзделген. Сонымен қатар, қалада жаңа жылу нысандарының құрылысы жүріп жатыр. Атап айтқанда, Оңтүстік-Батыс тұрғын алабында қуаты 49 Гкал/сағ кварталдық қазандықтың құрылысы жалғасуда. Сондай-ақ, жылу желілері салынуда. Жұмыстар қазанда аяқталады деп жоспарлануда.

«Талдықорғанда және Текеліде жекеменшік инвестициялардың қолдауымен газ турбиналы станцияларының жалпы қуаты 118 Гкал/сағ бойынша кезең-кезеңмен іске қосылады. Сонымен қатар, осы жобалар аясында 137 МВт электр қуаты іске қосылады», — деді облыстық энергетика және тұрғын үй-коммуналдық шаруашылық басқармасының басшысы Айдос Бекетаев.

Дайындықтың негізгі бағыттарының бірі жеткілікті отын қорын жасау болып табылады.

Жылумен жабдықтау кәсіпорындары 6,4 мың тонна мазут және 300 мың тонна көмірді дайындауда, сатып алу 100% орындалды. Бюджеттік ұйымдарға 15,1 мың тонна көмір және 10,2 миллион литр сұйық отын сатып алынды. Бүгінгі таңда халыққа 50,3 мың тонна көмір өткізіліп отыр.

«Көпқабатты тұрғын үй қоры мен әлеуметтік сала нысандарын дайындауға ерекше назар аударылуда. 1 703 көпқабатты тұрғын үйдің 1 676-сы, яғни 98%, дайын. 1 294 бюджеттік нысанның ішінде 609 білім беру және 360 медицина нысаны толық дайын», — деп атап өтті А. Бекетаев.

Жалпы, Жетісу өңіріндегі алдағы жылыту маусымына дайындық бекітілген жоспар кестесіне сәйкес жүріп жатыр және өңір басшылығының тұрақты бақылауында. Алдағы жылыту маусымының тұрақты және үздіксіз өтуі үшін барлық қажетті шаралар қабылдануда.

Жетісу облысы энергетика және тұрғын үй-коммуналдық шаруашылығы басқармасының сайтына сілтеме жасай отырып

Фото: gov.kz