Шымкент пен Түркістан облысында ұлттық жоба аясында электр желілерін жаңарту бойынша пилоттық жобалар аяқталды

Шымкент пен Түркістан облысында Энергетика және коммуналдық секторды жаңғырту ұлттық жобасы аясында электр желілерін жаңарту бойынша пилоттық жобалар аяқталды.

"Оңтүстік Жарық Транзит" ЖШС Шымкент пен Түркістан облысында екі пилоттық жобаны сәтті жүзеге асырды. Шымкентте жалпы ұзындығы 14,37 км болатын 35 кВ «Л-Кайтпас» және «Л-XXI Партсъезд» әуе электр жеткізу желілері қайта жаңартылды. Ескі болат-алюминий сымдар қазіргі заманғы композитті өзегі бар жоғары температуралы сымдарға ауыстырылды.

Шымкенттегі жоба 24 мың абонентке электрмен жабдықтаудың сенімділігі мен сапасын арттырып, желілердің тозу деңгейін 81%-дан 20%-ға дейін төмендету арқылы желілердің өткізгіштік қабілетін 27 МВт-қа арттыруға мүмкіндік берді.

Инновациялық композитті сым тіректердің ауқымды жаңғыртылуынсыз желілердің жүктемелік қабілетін арттырады, жабдықтың қызмет ету мерзімін ұзартады және электр энергиясының технологиялық шығындарын азайтады.

Түркістан облысында жалпы ұзындығы 89,763 км болатын 0,4 кВ әуе электр жеткізу желілерінің 31 объектісі қайта жаңартылды. Жоба аясында тозығы жеткен тіректер темірбетон тіректерге ауыстырылып, өздігінен ұстайтын изоляцияланған сымдар (СИП) енгізілді, бұл 87,3%-дан 0%-ға дейін тозуды азайтып, 3 582 абонентке электрмен жабдықтаудың сенімділігін арттыруға, авариялылықты едәуір төмендетуге және желінің қауіпсіздік деңгейін жақсартуға мүмкіндік берді.

СИП технологиясы технологиялық бұзылуларды азайтып, сымдардың түйісуінен туындайтын қысқа тұйықталуларды болдырмайды және желілердің қолайсыз ауа райы жағдайларына төзімділігін арттырады.

Жобаларды қаржыландыру "Банк ЦентрКредит" АҚ кредиттік желісі арқылы жүргізілді, "Қазақстандық тұрғын үй компаниясы" АҚ пайыздық мөлшерлемені субсидиялау туралы оң шешім қабылдады, ал бөлінген қаражат толығымен мердігерлермен есеп айырысуларға бағытталды.

Бұл пилоттық жобалар электр желілік кешенге заманауи технологияларды енгізуге, инфрақұрылымның тозуын азайтуға, энергия тиімділігін арттыруға және аймақтың 27,5 мыңнан астам тұтынушыларына электрмен жабдықтау сапасын жақсартуға ықпал етеді.

"Оңтүстік Жарық Транзит" ЖШС электр желілік инфрақұрылымды жаңарту бойынша жүйелі жұмыстарды жалғастырып, тұрғындар мен бизнеске сенімді және тұрақты электрмен жабдықтауын қамтамасыз етуде.

Фото: gov.kz