Шымкентте 46 отбасыға жаңа пәтерлер берілді

46 отбасыға жаңа пәтерлер берілді. Шымкентте мұқтаж азаматтарды тұрғын үймен қамтамасыз ету бойынша жоспарлы жұмыс жалғасуда. Осы бағдарламаның аясында Асар-2 шағын ауданында 46 отбасыға жалдамалы тұрғын үйдің кілттері табысталды.

Бұл пәтерлер қаладағы коммуналдық тұрғын үй қорынан әлеуметтік әлжуаз топтарға жататын азаматтарға берілді. Олардың ішінде - мүгедектігі бар адамдар, толық емес отбасылар, ерекше қажеттіліктері бар балаларды тәрбиелеп отырған отбасылар, көпбалалы отбасылар, сондай-ақ жетім балалар мен ата-анасының қамқорлығынсыз қалған балалар бар.

Салтанатты рәсімге қала әкімі Ғабит Сыздықбеков қатысып, жаңа қоныстанушыларды осы маңызды оқиғамен құттықтап, бұл бағытта жүйелі жұмыс жүргізіліп жатқанын атап өтті.

«Азаматтарды қолжетімді және сапалы тұрғын үймен қамтамасыз ету мемлекеттік саясаттың басым бағыттарының бірі болып табылады. Үй алу — әр отбасы үшін тек қоныс тойы ғана емес, бұл тұрақтылықтың, болашаққа сенімділіктің және әл-ауқаттың негізі», — деді қала әкімі.

Өткен жылы әлеуметтік әлжуаз топтарға жататын азаматтар үшін 1 529 пәтер сатып алынды. Қазіргі уақытта олардың бір бөлігі балансқа қабылданды, ал қалғандары «Отбасы банк» АҚ арқылы тіркеу және бөлу рәсімдерінен өтуде.

Жыл басынан бері 235 пәтер таратылды, оның ішінде 117-сі тұрғындарға тапсырылды. Бүгін тағы 46 отбасы пәтер алды, қалған пәтерлер кезекте тұрған азаматтарға жақын арада берілетін болады.

2025 жылдың қорытындысы бойынша Шымкентте 1 381 000 шаршы метр тұрғын үй пайдалануға беріледі, бұл тұрғын үй құрылысының тұрақты дамуын және халықты қолжетімді тұрғын үймен қамтамасыз ету бойынша мемлекет басшысының тапсырмаларының орындалуын көрсетеді.

ЖКХ24 Шымкент қаласының Тұрғын үй басқармасының сайтына сілтеме жасай отырып хабарлайды.

Фото: gov.kz