Қазақстанның Энергетика министрлігінде Әділетті энергетикалық ауысуды дамыту бойынша ЕҚДБ өкілдерімен кездесу өтті

Қазақстанның Энергетика министрлігінде энергетика вице-министрі Бақытжан Ильяс пен Еуропа қайта құру және даму банкінің (ЕҚДБ) өкілдері арасында Әділетті энергетикалық ауысуды дамыту (JETP) бойынша кездесу өтті.

Кездесуге ЕҚДБ-ның климаттық стратегия және іске асыру департаменті директоры, Тұрақты Инфрақұрылым Тобын басқарушы Фелисити Спорс, Қазақстандағы ЕҚДБ басшысының орынбасары, Еуразиядағы энергетика бойынша аймақтық жетекші Ерлан Рамазанов, климаттық стратегия және іске асыру департаменті басшысының орынбасары, энергетикалық ауысу бөлімінің жетекшісі Кристиан Карраретто, аймақтық саясат және стратегия бойынша жетекші сарапшы Майра Карасаева, аймақтық саясат және стратегия бойынша аналитик Айгерим Салықбай, энергоресурстары департаментінің банкирі Ілияс Ахетов және аудармашы Александра Нигай қатысты.

Тараптар JETP жобалық портфолиосын қалыптастыру, халықаралық серіктестермен өзара әрекеттестікті дамыту және Қазақстандағы бастаманы институционалдық нығайту мәселелерін талқылады.

Жиынды ашқан энергетика вице-министрі Қазақстан үшін JETP-тің ұлттық климаттық мақсаттарға қол жеткізуде, инвестициялар тартуда және қазіргі заманғы технологияларды енгізуде маңызды құрал екенін атап өтті.

Партнерлікті институционалдау мәселелеріне ерекше назар аударылды. Министрлік платформаның негізгі тәсілдері мен жұмыс механизмдерін нормативтік құқықтық актілерде бекіту, қатысушылардың өзара әрекеттесуінің айқын ережелерін анықтау және бастаманы жүзеге асыру үшін тұрақты негіз қалыптастыру қажеттігін есептейді.

Энергетика министрлігі JETP институционалдық базасын дамытуға қолдау көрсетуге дайын болғаны үшін ЕҚДБ-ға алғыс білдіріп, банк мамандарының нормативтік және ұйымдастырушылық механизмдерді әзірлеуде көрсеткен сараптамалық қолдауына ризашылығын білдірді.

Кездесу қорытындысы бойынша тараптар бірлесе жұмыс істеп, Қазақстандағы Әділетті энергетикалық ауысуды дамыту бойынша ары қарайғы ынтымақтастықтың жалғасатынын растады.

деп хабарлайды ТҮКШ24, Энергетика министрлігінің сайтына сілтеме жасап.

Фото: gov.kz