Қазақстанда 2026 жылы тұрғын үй-коммуналдық шаруашылықты жаңартуға инвестициялар көбейеді

Энергетикалық және коммуналдық секторды жаңғырту бойынша Ұлттық жобаның аясында Қазақстанда 2026 жылы коммуналдық шаруашылықты жаңартуды белсенді түрде жалғастыру көзделуде.

Қажетті нормативтік база жасалды: заңдар мен заңға тәуелді актілерге өзгерістер енгізіліп, жобаларды тиімді іске асыру және инвестициялар тарту үшін жағдай жасалған. 2025 жылдың қорытындысы бойынша Шымкент, Түркістан, Солтүстік Қазақстан, Қарағанды, Павлодар және Жетісу облыстарында 6 пилоттық жоба жүзеге асырылып, электрмен жабдықтау мен жылумен жабдықтаудың сенімділігі артты, желілердің тозуы төмендеді және электроэнергия өндірісі ұлғайды.

Практикалық нәтижелер көрсеткендей, жаңғырту қызмет көрсету сапасына және апаттылықтың төмендеуіне ықпал етеді. 2026 жылы тағы 8 табиғи монополия субъектісі инфрақұрылымның сыни аймағынан шығады деп күтілуде, бұл коммуналдық жүйелердің сенімділігі мен тұрақтылығын арттырады.

Биыл инвестицияларға басымдық берілуде. Ұлттық жоба аясындағы электрондық платформада сатып алу процедураларына дайын 206 жоба әзірленген. Жылумен жабдықтау және коммуналдық инфрақұрылым нысандарын жаңғырту бойынша 23 млрд теңгеге келісімшарттар жасалды.

Қосымша, қаржы институттары арқылы жаңғырту жобалары жүзеге асуда. "Қарағанды Жарық" ЖШС жобасы 16,7 млрд теңгеге мақұлданды және Қарағанды, Батыс Қазақстан және Павлодар облыстарындағы инфрақұрылымның тозуын төмендетуге және қызмет көрсету сапасын жақсартуға бағытталған 11 жоба жалпы сомасы 22,2 млрд теңгеге қаржыландырылды.

Сондай-ақ, саланы цифрландыруға ерекше көңіл бөлініп, сатып алу электрондық платформасын дамыту және «Smart Turmys» жүйесін енгізу арқылы коммуналдық қызметтерді алу тиімділігі мен ашықтығын арттыруда.

Мемлекеттік тарифтік саясат әлеуметтік бағыттылығын сақтап отыр. Халықты қолдау мақсатында тұрғын үй көмегінің механизмдері қолданылады. 2025 жылдың қорытындысында осындай көмекті 10 мыңнан астам отбасы алды.

Осылайша, 2026 жылы Ұлттық жобаның жүзеге асуы жалғасын табады, бұл инфрақұрылымның тозуын төмендетіп, халық үшін коммуналдық қызметтердің сапасын жақсартуды көздейді.

деп хабарлайды "ТКШ24" Табиғи монополияларды реттеу комитетінің ресми сайтына сілтеме жасап.

Фото: gov.kz