Қазақстанда ауылдардағы жалдамалы баспана беру тәртібі өзгерді

2026 жылдың 31 тамызынан бастап Қазақстанда ауылдық елді мекендерде жалдамалы баспана беру бойынша жаңа тәртіп қолданысқа енгізіледі. Тұрғын үйге мұқтаж ретінде есепте тұрған азаматтар өз ауданы шеңберіндегі қолайлы жалдамалы баспананы таңдап, оны алуға өтініш бере алады.

Бұл механизм мемлекеттік бюджет қаражаты есебінен жергілікті атқару органдары салған немесе сатып алған тұрғын үйлерге арналған.

Жаңартылған тәртіп бойынша өтініштерді бірінші қабылдау 2026 жылдың 1-7 қыркүйек аралығында baspana.otbasybank.kz порталында өтеді. Оған тек сол ауданда тұрғын үйге мұқтаж ретінде есепте тұрған азаматтар қатыса алады. Өтініш беру үшін қолданыстағы электрондық цифрлық қолтаңба қажет.

Өтініштер қабылдау аяқталғаннан кейін Отбасы банк алушылардың тізімін жасақтайды. Тұрғын үй бөлуде кезекке тіркелу күні, отбасының соңғы алты айдағы табыс деңгейі, отбасы құрамы және өтініш берушінің әлеуметтік мәртебесі ескеріледі.

Ережелерде азаматтардың жекелеген санаттарына басымдық берілуі көзделген. Мемлекеттік тұрғын үйдің кемінде 20%-ы жетім балалар мен ата-анасының қамқорлығынсыз қалған балалар арасында, ал кемінде 50%-ы әлеуметтік жағынан осал санаттағы азаматтарға бөлінеді.

Сонымен қатар, 2026 жылдың 14 қыркүйегінен бастап кезекке тұрғандар үшін тұрғын үйді анықтау шарттарына өзгерістер күшіне енеді. Тұрғын үйдің бөлмелік құрамын анықтауда отбасы құрамы ескеріліп, жұбайлар мен ата-аналарға, сондай-ақ әртүрлі жынысты балаларға бөлек бөлме беру талаптары қосылады.

Мұндай тәртіп аудан шеңберінде қолжетімді жалдамалы тұрғын үй пайда болғанда тұрақты негізде қолданылады.

деп хабарлайды ХҚШ24 ҚР ИИДМ Құрылыс және тұрғын үй-коммуналдық шаруашылық істері комитетінің сайтына сілтеме жасап.

Фото: gov.kz