Астанада «Таза Қазақстан» бағдарламасы аясында Сарыбұлақ өзенінің жағасы ретке келтірілді

Астанада Сарыбұлақ өзені жағалау аймағын тазалау және абаттандыру шеңберінде ауқымды экологиялық «Таза жағалау» акциясы өтті. Бұл туралы ресми ақпаратты Астана қаласының әкімдігінің сайты хабарлайды.

«Таза жағалау» экологиялық акциясы Қазақстан Республикасы Экология және табиғи ресурстар министрлігінің бастамасымен, Астана қаласының әкімдігі мен Астана қаласы бойынша экология департаментінің қолдауымен ұйымдастырылды. Өзен жағалауларының тазалығын сақтау жұмыстарына «Астана жастары» жастар ресурстық орталығының еріктілері белсенді қатысты.

Акция республикалық «Таза Қазақстан» бастамасы аясында өтті және жағалау аймақтарының тазалығын сақтау мен табиғатқа ұқыпты қарауды мақсат етті.

«Бүгін «Таза жағалау» экологиялық акциясы аясында су айдындарына жақын жағалау аймақтар тазаланып жатыр. Астанада акция барысында Сарыбұлақ өзенінің айналасындағы жерлер таза қалпына келтірілді. Осындай іс-шаралар жағалау аймақтарын тазалықта ұстауға ғана емес, қоршаған ортаға жауапты көзқарас қалыптастыруға да көмектеседі. Табиғат пен қалалық территориялардың тазалығына қамқорлық жасау - әркім өз үлесін қоса алатын ортақ міндет болуы маңызды», — деп атап өтті Астана қаласы бойынша экология департаменті басшысының орынбасары Әлімжан Жанбатыр.

Ақпарат көзі: Астана қаласы әкімдігінің сайтына сілтеме жасап, ТКШ24 хабарлайды.

Фото: gov.kz