Астанада «Антивандал» акциясы өтті

Астанадағы Сарыарқа ауданында «Антивандал» атты акция өтті. Бұл шара «Құқық пен тәртіп» қағидасы аясында ұйымдастырылды деп хабарлайды Астана әкімдігінің ресми сайты.

Акцияны ұйымдастыруды «Астана жастары» жастар ресурстық орталығы Сарыарқа ауданының әкімдігімен бірлесе қолға алды.

Волонтерлар Мухтар Әуезов көшесіндегі скейт-парк маңын көркейту ісіне қатысып, рұқсат етілмеген граффити мен жазуларды бояп жапты.

Орталықтың құқық бұзушылықтардың алдын алу бөлімінің жетекшісі Дәуржан Жұмахановтың айтуынша, мұндай акциялар 2024 жылдан бері өткізіліп келеді. Биыл орталық 357 акция өткізді.

«Біздің мониторингке сәйкес, қаладағы граффити жазуларының шамамен 70 пайызы Сарыарқа ауданында кездеседі. Сол себепті осы аудан ағымдағы акция үшін таңдалды. Біз үшін қаламыздың көркем болуы маңызды және біз қоғамдық орындардың бүлінуіне қарсымыз», - деп атап өтті ол.

Акцияға қатысқан волонтер Дарья Олейникова да аялдамалардағы, ғимарат қабырғаларындағы және орындықтардағы жазулар қаланың сыртқы бейнесіне нұқсан келтіретініне тоқталды.

«Мен осындай шараларға қуана қатысамын. Қала таза әрі көркем бола түседі. Жастардың да осындай игі істерге белсенді қатысқаны қуантарлық», - деп атап өтті волонтер.

Акция қаланың тазалығын сақтауға, қоғамдық нысандарға жауапкершілікпен қарауды қалыптастыруға және жастарды әлеуметтік пайдалы қызметке тартуға бағытталған.

ЖКХ24 Астана қаласы әкімдігінің сайтына сілтеме жасап жеткізеді.

Фото: Сайт Акимата города Астаны