Астанада QaJET платформасын іске қосу жолдарын талқылады

Астанада Қазақстанның әділ энергетикалық өтпелі кезең платформасының (QaJET) серіктестерінің Екінші Форумы өтті. Осы форумда 2026 жылдың қарашасында Анталияда өтетін COP31 халықаралық конференциясы аясында платформаны іске қосу бойынша алдағы қадамдар талқыланды.

2026 жылдың 30 қыркүйегі, Астана. Энергетика министрлігі, Экология және табиғи ресурстар министрлігі және Еуропалық қайта құру және даму банкінің (ЕҚДБ) ұйымдастыруымен өткен шараға мемлекеттік органдардың, халықаралық қаржы институттарының, даму серіктестерінің, инвесторлардың және технологиялық компаниялардың өкілдері қатысты.

Кездесуде басты назар QaJET платформасын әзірлеу барысында қол жеткізілген жетістіктерге, басым жобалар портфелін қалыптастыруға және оларды қаржыландыру тетіктеріне аударылды. Қатысушылар сондай-ақ COP31 аясында Платформаны ресми түрде іске қосуға дайындықты талқылады.

«Қазақстан үшін энергетикалық өтпелі кезең энергетикалық қауіпсіздік, энергияның қолжетімділігі және экологиялық тұрақтылықтың тепе-теңдігіне негізделуі тиіс. Біздің мақсатымыз – жекелеген генерация көздерін дамыту ғана емес, елдің ұзақ мерзімді экономикалық өсуін қамтамасыз ететін қазіргі заманғы, сенімді және технологиялық жетілдірілген энергетикалық жүйені құру. QaJET нақты жобаларды жүзеге асыру үшін мемлекеттік, халықаралық және жеке ресурстарды біріктіруге шақырылған», – деді энергетика вице-министрі Санжар Жаркешов.

QaJET 2060 жылға дейінгі көміртек бейтараптығына қол жеткізу бойынша Қазақстан стратегиясына және жаңартылған ұлттық тұрғыда айқындалған үлеске (NDC 3.0) сәйкес келеді.

Платформа аясында үш негізгі бағыт белгіленген: электр желілері шаруашылығын және энергия сақтау жүйелерін дамыту, жаңартылатын энергетика және электрлендіру. Инвестицияға деген жалпы қажеттілік шамамен 20 миллиард АҚШ долларын құрайды.

Атап айтқанда, 10 ГВт-қа дейін жаңартылатын энергия көздерін дамыту, желілік инфрақұрылымды және энергия сақтау жүйелерін модернизациялау, сондай-ақ көлікті, өнеркәсіпті және шағын және орта бизнесті электрлендіру көзделген.

2035 жылға дейінгі электр энергетикасын дамыту жоспарларына сәйкес Қазақстанда 26 ГВт-тан астам жаңа генерациялық қуаттар, оның ішінде кемінде 8,4 ГВт жаңартылатын энергия көздерінің қуаттары енгізіледі.

Форум нәтижелері бойынша қатысушылар QaJET жобалар портфелін қалыптастыру және COP31-де іске қосылуға дайындық мақсатында қаржыландыру тетіктерін тарту бойынша жұмысты жалғастыруға келісті.

деп хабарлайды ЖКХ24 Энергетика министрлігінің сайтына сілтеме жасап.

Фото: gov.kz