Астанада 10 мыңнан астам тұрғын Astana.kz цифрлық платформасын пайдаланады

Бүгінгі күні Астананың 10 мыңнан астам тұрғыны, олардың ішінде кәсіпкерлер мен инвесторлар, Astana.kz атты бірыңғай цифрлық платформаны қолдануда. Бұл портал арқылы қала қызметтерін онлайн режимде алу, өтініш беру, қажетті құжаттарды тіркеу және олардың қаралу барысын жеке кабинетте бақылау мүмкіндігі беріледі, деп хабарлайды Астана әкімдігінің ресми сайты.

Astana.kz астананың бірыңғай цифрлық кеңістігі ретінде қалыптасуда, онда қалалық қызметтер, коммуналдық сервистер және бизнесті жүргізу құралдары бір платформаға топтастырылуда.

Astana.kz-тің басты мақсаты – қалалық қызметтерді алуды қарапайым және түсінікті ету. Негізгі кезеңдер онлайн өтіп, бірнеше ұйымға бару және бір құжатты қайта-қайта ұсыну қажеттілігі жойылады.

Бүгінгі күні платформада тұрғын үй-коммуналдық шаруашылық саласында 100-ден астам қызмет қолжетімді. Олар электрмен жабдықтау, жылумен жабдықтау, сумен жабдықтау және су бұру, инженерлік желілерге қосылу, келісімшарттарды жасау мен қайта ресімдеу және басқа да бағыттарды қамтиды.

Astana.kz платформасында қалалық орта және урбанистика саласындағы қызметтер де бар. Қажетті материалдар электронды форматта жіберіліп, олардың қаралу нәтижелері платформа арқылы алынады.

Кәсіпкерлер үшін маңдайша жазулары мен сыртқы жарнама нысандарының эскиздерін келісу қызметтері қарастырылған. Цифрлық формат құжат тапсыруды оңайлатып, қарау процедурасын айқын етеді және бизнестің уақыт шығынын қысқартады.

Платформада сондай-ақ Astana Invest кәсіпкерлер мен әлеуетті инвесторлар үшін сервистерді ұсынады. Олардың ішінде инвестициялық бастамаларды сүйемелдеу және арнайы экономикалық аймаққа қатысу мәселелері бойынша өтініш беру мүмкіндіктері бар.

Astana.kz бір терезе қағидасына сәйкес дамып келеді. Платформаға кезең-кезеңмен әкімдіктің құрылымдық бөлімшелері, коммуналдық кәсіпорындар және бағынысты ұйымдар қосылып, қолжетімді қызметтер тізімі кеңейтіліп, пайдаланушыларға арналған цифрлық құралдар жетілдірілуде.

Болашақта Astana.kz платформасында негізгі қала сервистері, ақпараттық ресурстар және қала тұрғындарымен байланыс орнатудың цифрлық арналары біріктірілмек. Бұл тұрғындар мен бизнеске күнделікті мәселелерді бір цифрлық кеңістікте шешуге мүмкіндік береді.

Қолжетімді қызметтер мен платформаның мүмкіндіктерімен Astana.kz сайтында танысуға болады.

Айта кетейік, Astana.kz тұрғындар, кәсіпкерлер, инвесторлар және қалалық ұйымдар үшін қалалық қызметтерді, коммуналдық сервистерді және басқа да цифрлық құралдарды біріктіретін бірыңғай қалалық цифрлық платформа болып табылады. Платформаның операторы болып "Астана Innovations" АҚ табылады.

Фото: gov.kz