Алматыда Абай даңғылының орташа жөндеу жұмыстарына байланысты уақытша қозғалысты шектеу енгізіледі.

Тамыздың 24-і сағат 21:00-ден бастап қыркүйектің 1-не дейін Саин көшесінен бастап Момышұлы көшесіне дейінгі бөлікте қозғалыс ішінара шектеледі. Жөндеу жұмыстары кезең-кезеңімен бірнеше жолақтарда өткізіледі, толық жабылмайды.

Жөндеу аймағында ескерту белгілері және мердігер ұйым жетекшісінің байланыс ақпараты бар стендтер орнатылмақ. Осыған байланысты, өз маршруттарыңызды алдын ала жоспарлауыңызды сұраймыз.

Еске сала кетейік, қозғалысты шектеуге қатысты барлық ақпарат @AlmatyJoly Telegram арнасында, әкімдіктің әлеуметтік желілерінде, сондай-ақ 2GIS және «Яндекс карталар» сервистерінде орналастырылған. Бұл туралы ЖКХ24 Алматы қаласы әкімдігінің ресми сайтына сілтеме жасап хабарлады.

Фото: gov.kz

2026 жылдың 24 тамызынан бастап Шымкентте газ есептеуіштеріне жаңа талаптар күшіне енеді. Газбен алғашқы рет жабдықталатын абоненттерде деректерді қашықтан беру мүмкіндігі бар Smart-есептеуіштер болуы қажет.

2026 жылдың 24 тамызынан кейін техникалық шарттар алған жаңа тұтынушылар да Smart-есептеуіштер орнатуға міндетті. Өндірістік және коммуналдық-тұрмыстық тұтынушылар деректерді қашықтан беру мүмкіндігі бар есептеуіштерге 2027 жылдың 31 желтоқсанына дейін ауыстыруы тиіс.

Деректерді қашықтан беру мүмкіндігі газ тұтыну туралы мәліметтерді автоматты түрде жіберуге мүмкіндік береді, бұл есептеуді жеңілдетіп, ақпаратты жедел алуды қамтамасыз етеді.

Маңыздысы, газ желілеріне қосылған қолданыстағы тұрмыстық тұтынушылар үшін есептеуіштерді ауыстыру жаңа талаптар күшіне енгеге дейін газ таратушы ұйымның қаражаты есебінен жүзеге асырылады.

Жаңа талаптар Қазақстан Республикасының қазіргі заңнамасына сәйкес енгізіліп отыр, деп хабарлайды ЖКХ24 Шымкент қаласының энергетика және инфрақұрылымды дамыту басқармасының сайтына сілтеме жасап.

Фото: gov.kz