Алматыда «Таза Қазақстан» бағдарламасы аясында жаңа цифрлық шешімдер таныстырылды

Алматыда 2026 жылғы 3 тамызда қалалық әкімдіктің қолдауымен экологиялық мәдениетті дамыту, саналы тұтыну және қалдықтарды бөлек жинау жүйесін дамытуға арналған жаңа цифрлық құрал іске қосылды. Бұл бастама Алматы қаласының экология және қоршаған орта басқармасы және серіктестерімен бірлесе жүзеге асырылуда.

ECO Network цифрлық платформасының таныстырылымы Алматы экология және қоршаған орта басқармасы, Бірінші Эко-Хаб және ECO Network жобасымен бірлесіп ұйымдастырған Арбатта экологиялық фестиваль аясында өтті. Бір жыл бұрын қаладағы алғашқы қайта өңделген пластиктен жасалған орындық орнатылған алаңда іс-шараның өтуі символикалық мәнге ие болды.

Іс-шараға мемлекеттік мекемелердің өкілдері қатысты. Оларға жаңа цифрлық құралдың мүмкіндіктері көрсетілді және экологиялық бастамаға қатысу механизмі түсіндірілді. 3 тамыздан бастап мемлекеттік органдардың қызметкерлері тұрмыстық қалдықтарды сұрыптап, оларды тұрақты түрде қайта өңдеуге тапсыра отырып, бағдарламаға қосыла алады. Цифрлық платформа ұйымдардың экологиялық бастамаларға қатысу деңгейін нақты уақыт режимінде қадағалауға мүмкіндік береді.

Платформаның функционалдылығын одан әрі кеңейту жоспарлануда. Жасанды интеллект технологияларын пайдаланатын жаңа сервистерді енгізу, сондай-ақ бизнес өкілдерін, білім беру ұйымдарын, колледждер мен жоғары оқу орындарын жүйеге қосу көзделеді.

Сонымен қатар, іс-шара аясында Алматы экология және қоршаған орта басқармасы мен экологиялық серіктестермен бірлесе жүзеге асырылатын қала тұрғындарына арналған екі жаңа экологиялық бастама жарияланды. Жобалар қалдықтарды бөлек жинауды дамытуға, қайталама шикізатты өңдеу көлемін арттыруға және халықтың экологиялық мәдениетін арттыруға бағытталған.

Алғашқы бастама - «Қайта өңделген пластиктен жасалған жиһаз». Тұрғындар Маркова көшесі, 44 және Satbayev University мекен-жайларындағы Эко-Хабтарға пластик жеміс жәшіктері сияқты белгілі бір пластик түрлерін тапсыра алады. Жинақталған шикізат туралы ақпарат econetwork.me қосымшасында тіркеледі, ал қажетті көлем жиналғаннан кейін қатысушылар оны қайта өңделген пластиктен жасалған бұйымдарға ауыстыра алады.

Екінші бастама - «Мен өз жеріме қамқормын». Ол мобильді телефондар, планшеттер, электросамокаттар, дрондар және басқа техникалардан литий-ионды аккумуляторларды қауіпсіз жинауды және қайта өңдеуге тапсыруды қарастырады. Қабылдау сол Эко-Хабтарда ұйымдастырылады, ал қабылданатын бұйымдардың толық тізімі econetwork.me қосымшасында орналастырылады. Ең белсенді қатысушыларға құнды сыйлықтар қарастырылған.

«Республикалық «Таза Қазақстан» акциясы маңызды өзгерістердің катализаторы болды. Бүгінде экологиялық мәдениетті дамыту, заманауи технологияларды енгізу және қалдықтарды бөлек жинау мүмкіндіктерін кеңейтуге бағытталған бастамалар саны артып келеді. Алматы әкімдігі осындай жобаларды қолдайды және қала тұрғындары мен серіктестерімен бірлесе экологиялық бастамаларды жүзеге асыру үшін жағдай жасайды», - деп атап өтті Алматы қаласы экология және қоршаған орта басқармасының басшысы Серік Әділбаев.

деп хабарлайды ТКШ24 Алматы қаласы экология және қоршаған орта басқармасының сайтына сілтеме жасап.

Фото: gov.kz