Алматыда «Ең үздік жасыл балабақша» және «Ең үздік жасыл колледж» конкурстарының жеңімпаздары анықталды

Алматыда Президенттің «Таза Қазақстан» атты жалпыұлттық экологиялық бастамасы аясында ұйымдастырылған қалалық «Ең үздік жасыл балабақша» және «Ең үздік жасыл колледж» конкурстарының жеңімпаздарын марапаттау рәсімі өтті.

Бұл конкурстарды ұйымдастырушысы Алматы қаласының білім басқармасы болды. Конкурстардың мақсаты — оқу орындарында экологиялық мәдениетті дамыту, балалар мен жастарда қоршаған ортаға жауапты қарау сезімін қалыптастыру, сондай-ақ көгалдандыру және экологиялық тәрбиелеу саласындағы практикалық бастамаларды қолдау.

«Ең үздік жасыл балабақша» конкурсына Алматының мектепке дейінгі мекемелері қатысты. Аудандық кезеңде қатысушылар жобаларын ұсынды, кейіннен олардың ішіндегі үздіктері қалалық кезеңге өтті. Бағалау кезінде аумақтың көгалдандырылу деңгейі, тәрбиеленушілердің қатысуымен экологиялық жобалардың жүзеге асырылуы, сондай-ақ ұсынылған бастамалардың практикалық бағыттылығы есепке алынды.

Конкурс қорытындысы бойынша жүлделі орындар төмендегідей бөлінді:

• І орын — Алатау ауданының №31 балабақшасы;
• ІІ орын — Әуезов ауданының №186 балабақшасы;
• ІІІ орын — Медеу ауданының №125 балабақшасы.

Қалалық мектепке дейінгі ресурс орталығының жетекшісі Наталья Қарасеваның айтуынша, «Ең үздік жасыл балабақша» конкурсы Алматыда алғаш рет ұйымдастырылып, экологиялық тәрбие саласында тәжірибе алмасу алаңына айналды.

«Критерийлер көп болды. Олардың ішінде балабақшалардың ландшафттық дизайны мен балалармен экологиялық тәрбиелеу бойынша жобалық жұмыстар ерекше орын алды», – деп атап өтті Наталья Қарасева.

Жеңімпаздардың бірі — №31 балабақша, мұнда «Жасыл балабақша» бағдарламасы жүзеге асырылуда. Экологиялық бастамаларға тәрбиеленушілер мен олардың ата-аналары да қатысады. Бағдарлама аясында балалар қалдықтарды бөлек жинау негіздерімен танысады, суды және электр энергиясын үнемдеуді үйренеді, өсімдіктерді баптап, жылыжайларда көкөністер өсіруді меңгереді.

«Балалар басынан бастап экология мен қоршаған ортаны қорғау жобаларымен жұмыс істейді. Олар қоқыстарды сұрыптауды үйреніп, екінші рет өмірге келтірілетін заттарды арнайы шеберханаларда пайдаланады», – деп түсіндірді №31 балабақшаның меңгерушісі Айнұр Бахтиева.

Экологиялық тәрбиелеудің практикалық бөліміне бақша мен жылыжайларды суару үшін тамшылатып суару жүйесін қолдану. Органикалық қалдықтар органикалық тыңайтқышқа айналдырылады. Балабақша аумағында күн панельдері де орнатылған.

Алматыда алғашқы рет «Ең үздік жасыл колледж» қалалық конкурсы өтті, оған техникумдар мен колледждер қатысты. Конкурс қорытындысы бойынша:

• І орын — №1 Алматы қазақ гуманитарлық-педагогикалық колледжі;
• ІІ орын — Алматы құрылыс-техникалық колледжі;
• ІІІ орын — Алматы телекоммуникациялар және машина жасау колледжі.

№1 Алматы қазақ гуманитарлық-педагогикалық колледжінде конкурс аясында «Эко-кампус», «Жасыл кеңістік» және «Экологиялық мәдениет» жобалары жүзеге асырылды. Студенттер мен мұғалімдер аумақты көгалдандыру, ағаш отырғызу және «Мұғалімдер аллеясын» құру жұмыстарына қатысты. Экологиялық бастамаға колледждің түлектері де белсенділікті көрсетті.

Екі конкурстың жеңімпаздары мен жүлдегерлері Алматы қаласының білім басқармасының дипломдарымен марапатталды.

Жаңалықты Алматы қаласы әкімдігінің сайтына сілтеме жасай отырып, Тұрғын үй-Коммуналдық шаруашылық 24 хабарлайды.

Фото: gov.kz