Ақмола облысында жылу беру маусымына дайындық жалғасуда

Ақмола облысында алдағы жылу беру маусымына қызу дайындық жұмыстары жүргізілуде. Жылу беру маусымына дайындық мәселелері Степногорск қаласында облыс әкімінің бірінші орынбасары Ельдос Рамазановтың төрағалығымен өткен көшпелі жиынның басты тақырыбына айналды. Қаланың осы жиынды өткізу алаңы ретінде таңдалуы тегін емес — Степногорск өңірдің энергетикалық қауіпсіздігін қамтамасыз етуде стратегиялық буын болып табылады.

Жұмыс сапары барысында қатысушылар жылумен қамтамасыз ету нысандарының жағдайы мен қала инфрақұрылымының күз-қыс мезгіліне дайындығын көрді. Негізгі назар жылу жүйелерінің жөндеуіне, қазандық жабдықтарын жаңартуға және энергиямен қамтамасыз етудің сенімділігіне аударылды.

Степногорскіде жылу жүйелерінің ауқымды қайта құру жұмыстары жүруде. Жоспарланған 8,5 шақырымның бірінші кезеңінде 7,4 шақырымы, яғни 87%-ы жөнделді. Жұмыстарды қыркүйек айының ортасына дейін аяқтау жоспарлануда. Сонымен қатар магистральды жылу жүйесінің жөндеуі жүргізілуде — ағымдағы жылдың жоспарланған көлемінің жартысы орындалған.

Степногор жылу электр орталығында да жаңарту жұмыстары жалғасуда. Мұнда қазандықтар, турбиналар, түтін мұржалары және күл шығару құбырларының жөндеулері жүргізілуде. Бір қазандық пен бір турбинаның жөндеуі аяқталып, екі түтін мұржасы қалпына келтірілді. 7,5 шақырым жылу трассасы толықтай салынған.

Жұмыс сапары барысында ерекше назар Аккол қаласындағы блокты-модульді қазандықтарға аударылды. Нысандардағы жұмыстың барысы мен жабдықтардың алдағы жылу маусымына дайындығы тексерілді. Қалада екі БМК — Абай көшесінде және «Орталықта» құрылыс жұмыстары жүргізілуде. Біріншісі 90%-ға, екіншісі 40%-ға дайын. Жұмыстарды қыркүйек айында аяқтау жоспарлануда.

Жалпы алғанда облыс бойынша қысқы маусымға дайындық бірнеше бағытта жүргізілуде. Ағымдағы жылы 38,2 шақырым жылу жүйелерін қайта құру қарастырылған, олардың 27,6 шақырымы, яғни 70%-ы орындалды. Сонымен қатар қазандықтарды ауыстыру жалғасуда: жоспарланған 26 қазандықтан 20-сы орнатылды.

Щучинде үлкен көлемдегі жұмыстар жүргізілуде. Мұндағы бірнеше қазандықтың жылу жүйелері қайта құрудан өтуде. Әсіресе, №20 қазандықтың жылу трассасының 5 шақырымы жөнделді. Жұмыстар қыркүйек айында аяқталмақ.

Көкшетауда Саин және Потанин көшелеріндегі жылу желілерінің реконструкциясы аяқталуда. Аудандық қазандықтардың құрал-жабдықтарын жөндеу жұмыстары қатар жүргізілуде. №9 РК-2 қазандықта электрофильтрді ауыстыру жүріп жатыр.

Атбасарда жылу желілерінің реконструкциясы аяқталуға жақын, ал орталық қазандықтың жөндеу жұмыстары қатар жүргізілуде. Сандықтау ауданында Балкашино ауылында блокты-модульді қазандықтың құрылысы аяқталуға жақын. Оның дайындығы 80%, қалған жұмыстарды жылу беру маусымы басталғанға дейін аяқтау жоспарланады.

Макинскіде де белсенді жұмыс жүргізілуде: блокты-модульді қазандықта сегіз қазандық ауыстырылуда. Жаңа жабдықтар Жақсын, Жарқайын, Егіндікөл, Есіл және Шортанды аудандарында орнатылуда. Қосшыда қазандық жабдығын жаңғырту, оның қуатын арттырумен қатар жүргізіліп, Шантөбе ауылында жылу жүйелерінің жөндеулері жасалуда.

Дайындықтың маңызды бөлігі ретінде әлеуметтік нысандар мен тұрғын үй қорының дайындық деңгейі қарастырылуда. Қазіргі уақытта 517 денсаулық сақтау нысаны және 406 білім беру нысанының 376-сы жылу маусымына дайын. Облыста көпқабатты тұрғын үйлердің 87%-ы дайын.

Коммуналдық қазандықтар үшін жанармай қорын құрушыылы жалғасуда. Облыс аудандары мен қалаларында көмір жеткізу және оның қорын жинау бойынша келісімдер жасалуда. Сонымен қатар энергия көздерін қажетті мазут көлемімен қамтамасыз ету мәселесі шешілу үстінде.

Электр желілерінің дайындығы — тағы бір маңызды бағыт. Энергияны тасымалдаушы ұйымдар желілері мен қосалқы станцияларын жөндеу жұмыстарын жалғастыруда. Жөндеу жұмыстарынан кейін олардың тозуы азаятыны күтілуде.

Алдағы бірнеше апта ішінде жөндеу жұмыстарын аяқтау, жылу жүйелерін жуу және басу, отынның нормативтік қорын жинау және дайындық паспорттарын алу басты назарда болады. Барлық іс-шаралар қатаң бақылауда және белгіленген мерзімде аяқталуы тиіс.

деп хабарлайды "ТКШ24" Ақмола облысы энергетика және тұрғын үй-коммуналдық шаруашылық басқармасына сілтеме жасап.

Фото: gov.kz