Қазақстандағы жаңа газ өңдеу қуаттары 2030 жылға дейін іске қосылады

2030 жылға дейін Қазақстанда жаңа газ өңдеу қуаттары іске қосылып, ішкі тұтынуға арналған тауарлық газ өндірісінің көлемін 29,6%-ға арттыруға мүмкіндік береді. Бұл туралы Үкімет отырысында Энергетика министрі Ерлан Ақкенженов мәлімдеді.

«Өсім Қашаған мен Қарашығанақтағы өңдеу қуаттарын іске қосу есебінен қамтамасыз етіледі. Бұл инфрақұрылымды кеңейтіп, өңірлерді тұрақты газбен жабдықтауға кепілдік береді. Қосымша тауарлық газ көлемі 2027-2030 жылдар аралығында 1,6 млрд м3, 2031 жылы – 2,3 млрд м3, 2032 жылы – 6,6 млрд м3 құрайды», — деді министр.

Ерлан Ақкенженовтің айтуынша, уақытылы инфрақұрылым нысандарын іске қосу басым міндеттердің бірі болып қала береді. 2025 жылдың қазан айында "Талдықорған – Үшарал" магистральды газ құбыры пайдалануға беріледі. Сонымен қатар, ағымдағы жылдың соңында "Бейнеу-Бозой-Шымкент" газ құбырларының екінші желісінің бірінші кезеңінің сызықтық бөлігінің құрылысы аяқталады, ал оның екінші кезеңі 2029 жылы аяқталады, бұл қуаттылықты жылына 15 млрд м3 тауарлық газға дейін арттырады.

«2027 жылы Қашағандағы 1 млрд м3/жыл және Жаңаөзендегі КазГПЗ 0,9 млрд м3/жыл газ өңдеу зауыттарын іске қосу күтіледі. 2030 жылға қарай Қашағандағы қуаттылығы 2,5 млрд м3/жыл және Қарашығанақтағы қуаттылығы 5 млрд м3/жыл газ өңдеу зауыттарының іске қосылуы көзделген. Бұл жобаларды іске асыру газ өңдеуді ұлғайтып, газ тасымалдау инфрақұрылымын кеңейтуге және өңірлерді тұрақты газбен жабдықтауға қамтамасыз етуге мүмкіндік береді», — деп атап өтті министр.

деп хабарлайды ТКШ24 Энергетика министрлігінің ресми сайтына сілтеме жасап.

Фото: gov.kz