Алматы әкімі Дархан Сатыбалды вьетнамдық инвесторлармен Almaty Downtown жаңа іскерлік ауданын дамыту мәселесін талқылады

Алматы әкімі Дархан Сатыбалды ROX Group инвестициялық тобының ірі вьетнамдық девелоперлік бөлімшесі ROX Living Global өкілдерімен кездесу өткізді. Кездесудің басты тақырыбы компанияның Almaty Downtown жаңа іскерлік ауданын дамытуға қатысуы болды.

Кездесу барысында ROX Living Global компаниясының бас директоры Чан Тхи Ми Лок басшылығындағы делегация тұрғын және коммерциялық жылжымайтын мүлікпен көпфункционалды кешен салу бойынша ұсыныстарын таныстырды.

Ұсынылған тұжырымдамаға тұрғын аудандар, кеңсе және сауда алаңдары, білім беру және медициналық нысандар, спорт инфрақұрылымы мен қоғамдық кеңістіктерді орналастыру кіреді. Аумақты көгалдандыру, жаяу жүргінші аймақтары мен абаттандыруға жеке көңіл бөлінген.

Дархан Сатыбалды Алматының жаңа іскерлік белсенділік орталықтарын қалыптастыра отырып, полицентрлік дамуға көшіп жатқанын атап өтті. Солардың бірі Almaty Downtown болмақ.

«Көпфункционалды кешен құрылысы бойынша бастамаларыңызды қолдаймыз. Өз тарапымыздан әкімдік жобаға жан-жақты қолдау көрсетеді. Практикалық іске асыруға жедел көшуді күтеміз», – деді Алматы әкімі.

Жылжымайтын мүлік, қаржы, энергетика және қонақ үй бизнесі саласында жұмыс істейтін ROX Group 1996 жылы құрылған. Топтың инвестициялық портфелі әлемнің 12 елінде 100-ден астам жобаны қамтиды. Орталық Азиядағы ең ірі жобаларының бірі Бішкекте жүзеге асырылуда.

ЖКХ24 Алматы қаласы әкімдігінің сайтына сілтеме жасай отырып хабарлайды.

Фото: gov.kz