Жетісу облысында Дүниежүзілік тазалық күні өтті: шамамен 50 мың тұрғын қатысты

Жетісу облысында «Таза Қазақстан» ұлттық бағдарламасы аясында Дүниежүзілік тазалық күніне орай бірнеше экологиялық акция өтті, оған шамамен 50 мың адам қатысты. Іс-шара нәтижесінде 9500 көшет отырғызылып, 3000 тонна қоқыс жиналды.

Талдықорғандағы «Жастар» саябағында санитарлық тазалау және ағаш отырғызу шараларына облыс әкімі Бейбіт Исабаев қатысып, мемлекеттік органдар, түрлі ұйымдар мен кәсіпорындар, қоғамдық бірлестіктер, кәсіпкерлер, жастар және еріктілердің белсенді қатысуын атап өтті. Сенбілік кезінде саябақ тазарып, 100 жапырақты ағаш отырғызылды. Жалпы Талдықорғанда бұл күні 1000 көшет отырғызылды.

— Мемлекет басшысының бастамасымен жүзеге асырылып жатқан «Таза Қазақстан» бағдарламасы аясында біз тұрғын жерлерді көгалдандыру және абаттандыру жұмыстарын белсенді жүргізіп келеміз. Екі жыл бойы тек ағаш қана отырғызбай, «Жастар», «Жеңіс», «Ардагерлер» саябақтарын және Каратал өзенінің жағалауын абаттандыру, суару жүйесін жаңғырту жұмыстарын атқарудамыз. Жалпы, облыстағы әр ауданның ауылдық елді мекендеріндегі саябақтар мен демалыс орындарында тәртіп орнатудамыз. «Таза Қазақстан» бағдарламасы — бұл тек табиғаттың тазалығы мен саябақтардың абаттандырылуы ғана емес, сондай-ақ рухани тазарту, адамның санасын ояту. Біз әрдайым өз аулалары мен қалаларын тазалауға белсенді қатысатын ұжымдар мен тұрғындарды қолдаймыз. Бұл қоғамды жаңартуда маңызды бөлік, — деді облыс әкімі Бейбіт Исабаев.

Шараға қатысқан жастар пікірлерін де ортаға салды.

— Ағаш қаншалықты көп болса, ауа соншалықты таза, сондықтан мен осындай шараларға қатысуды маңызды деп санаймын. Ағаш отырғызу, оларға күтім жасау және тазалықты сақтау қажет. Бәрі әр адамның үлесіне байланысты екенін ұмытпаңыздар. Егер айналаңыз жасыл және таза болса, жаның да тыныш болады. Таза қала өзіңнен басталады дейді ғой. Сондықтан, мен барлығын қоршаған ортаға және туған табиғатқа ұқыпты қарауға шақырамын. Талдықорғанымыз жасыл әрі гүлденген болсын, — деп мәлімдеді жас эковолонтер Аяжан Нұрахметова.

Оның сөзін Талдықорған тұрғыны Жанар Болатқызы құптады:

— Біздің экоакцияларға жастардың белсенді қатысуын көру жағымды. Біз бірге қаланың аймақтарын абаттандырудамыз. Бұл біз үшін жай ғана тазалық емес, туған Талдықорғанымыздың экологиялық жағдайын жақсартуға қосқан өз үлесіміз. Әркім тазалықты сақтаса, қала әлдеқайда таза және жайлы болады, — деп атап өтті ол, жерлестерін сенбілік және экологиялық бастамаларға белсенді қатысуға шақырып.

Жыл басынан бері Жетісу облысында экологиялық мәдениет қалыптастыру және қоршаған ортаны қорғау шеңберінде 181 іс-шара ұйымдастырылып, оған 180 мыңнан астам адам қатысты. Нәтижесінде 68 мың көшет отырғызылып, 15 мың тонна қоқыс шығарылды.

Жетісу облысы әкімінің баспасөз қызметі

Фото: gov.kz