Қазақстанда 50 бірлік ЖЭО қондырғыларының күрделі жөндеуі аяқталды

50 негізгі ЖЭО қондырғысы күрделі жөндеуден өтті. Бүгін Қазақстан Республикасы Президентінің жанындағы Орталық коммуникациялар қызметінде алдағы жылыту маусымына елдің энергетикалық инфрақұрылымын дайындауға арналған баспасөз конференциясы өтті.

Энергетика министрлігінің Мемлекеттік энергетикалық қадағалау және бақылау комитеті төрағасының орынбасары Ернар Хасенов жөндеу науқанының барысы, энергетикалық нысандардың, электрлік және жылу жүйелерінің дайындық жай-күйі, сондай-ақ алдағы жылыту маусымы үшін отынмен қамтамасыз ету туралы баяндады.

Жылыту маусымына дайындық жоспарлы режимде жүргізіліп жатқандығы атап өтілді. Комитет және оның аумақтық департаменттері энергетикалық нысандардағы жөндеу жұмыстарының сапасы мен мерзімдерін тұрақты бақылауда ұстап отыр.

Ағымдағы жылы электр станцияларында 9 энергия блогын, 55 қазандықты және 51 турбинаны күрделі жөндеуден өткізу жоспарланған. Жөндеу науқанына 384 млрд теңге қарастырылған, бұл өткен жылғы деңгейден 9%-ға жоғары.

Бүгінгі күнде 3 энергия блогында, 26 қазандықта және 21 турбинада жөндеу жұмыстары жүргізіліп жатыр. Сонымен қатар 50 негізгі қондырғыда, оның ішінде 4 энергия блогында, 28 қазандықта және 18 турбинада күрделі жөндеу толық аяқталды.

Электр желілерінде де үлкен көлемдегі жұмыстар атқарылды. Электр жеткізу желілерінің күрделі жөндеуі толықтай аяқталды – 17,1 мың км желі жөнделді. Сондай-ақ 444 қосалқы станцияның 404-інде жөндеу аяқталған, бұл 91%-ды құрайды. Сонымен қатар 3 209 тарату пункті мен трансформаторлық қосалқы станция жөнделді.

Жылу жүйелерін дайындауға да ерекше назар аударылды. 2026 жылға олардың жөндеуіне және жаңғыртуына 377 км қарастырылған. Қазіргі уақытта жұмыстардың орындалуы 89%-ды құрауда. Жөндеу науқанының нәтижесінде жылу жүйелерінің тозу орташа деңгейінің 48%-ға дейін төмендеуі күтілуде.

Отынмен қамтамасыз ету мәселелері де тұрақты бақылауда. Қуат нүктелері қоймаларында 4,2 млн тонна көмір және 131 мың тонна мазут жиналған.

Алдағы жылыту маусымында коммуналдық-тұрмыстық сектор мен халықтың көмірге қажеттілігі 7,5 млн тонна көлемінде анықталды, оның ішінде 1,6 млн тонна – коммуналдық-тұрмыстық сектор үшін және 5,7 млн тонна – халық үшін. Қажетті көлемдер бекітілген жоспар-графикке сәйкес қамтамасыз етіледі.

Көмірдің өндірушіден өңірге дейінгі қозғалысын қамтамасыз ету үшін тұрақты бақылау жүргізілуде. Осы мақсатта барлық мүдделі тараптардың қатысуымен Республикалық штаб жұмыс жасауда.

деп хабарлайды ТКШ24 Энергетика министрлігінің сайтына сілтеме жасап.

Фото: gov.kz