Астанада мобильді интернет сапасын жақсарту үшін 12 жаңа тірек орнатылды

Астанада мобильді байланыс сапасын арттырып, интернет қамту аймағын кеңейту мақсатында қос мақсаттағы тіректер орнату жобасы жүзеге асырылуда, деп хабарлайды Астана қаласының әкімдігі сайтына сілтеме жасап Тұрғын үй-коммуналдық шаруашылық 24.

Бұл тіректер сыртқы көрінісі бойынша қарапайым көше шамдарынан айтарлықтай айырмашылығы жоқ секілді көрінеді. Алайда олардың ішінде қаланың телекоммуникациялық желісін дамытуға арналған мобильді байланыс жабдықтары орнатылған.

Осындай шешім заманауи қала үшін ерекше мәнге ие. Қос мақсаттағы тіректерді орналастыру арқылы байланыс жабдықтарын тікелей қалалық ортада біріктіруге және кеңістікті барынша тиімді пайдалануға мүмкіншілік бар.

Техникалық элементтер конструкцияның ішінде орналасқандықтан, тіректердің сыртқы көрінісі эстетикалық және ықшамды болып қалады, ол астананың бірегей дизайн-кодына сәйкес келеді.

Жобаны Астана қаласының цифрландыру және мемлекеттік қызметтер басқармасы мен Beeline Қазақстан мобильді операторы бірлесе жүзеге асыруда.

«Жобаның негізгі мақсаты — қаладағы мобильді байланыстың сапасы мен интернет қамту деңгейін арттыру. Астана дамыған сайын, телекоммуникациялық инфрақұрылымға деген талаптар да өсіп келеді. Қос мақсаттағы тіректер қажетті жабдықты қала ортасында орналастыруға мүмкіндік беріп, оны жарықтандыру инфрақұрылымымен біріктіреді және қосымша конструкциялармен кеңістікті ауырлатпайды. Бұл заманауи қаланың ерекшеліктерін ескере отырып, сандық инфрақұрылымды дамытуға мүмкіндік беретін практикалық шешім», — дейді Астана қаласының цифрландыру және мемлекеттік қызметтер басқармасының басшысы Берік Ахметов.

Келешекте мұндай объектілердің функционалы кеңейтілуі мүмкін. Тіректер бейнебақылау камералары мен ауа сапасын өлшейтін датчиктер сияқты түрлі жүйелерді орналастыру, интеллектуалды жарықтандыру және басқа да Smart City технологияларының шешімдері үшін қолданылуы мүмкін.

«Осындай жобалар байланыс дамуының қаланың және бизнестің ортақ міндеті екенін айқын көрсетеді. Қажеттіліктерді бірге талқылап, тиімді шешімдер табуға мүмкіндік болған кезде жұмыс тезірек жүреді, ал нәтижелері айқын болады. Біз Астана қаласының цифрландыру басқармасымен осы жобаны жүзеге асыру аясындағы ынтымақтастыққа қуаныштымыз. Қос мақсаттағы тіректер артық конструкциялармен қалалық кеңістікті ауырлатпай, мобильді желіні дамытуға мүмкіндік береді», — деді Beeline Қазақстан техникалық директоры Тұңғышбек Батталханов.

Фото: gov.kz