Алматыда сыртқы жарнама нысандарын белгіленген талаптарға сәйкестендіру бойынша белсенді жұмыс жүргізілуде. Бұл туралы Алматы қаласы сәулет және қала құрылысы басқармасы хабарлады.

Мониторинг қорытындысы бойынша Сыртқы көру жарнамасын орнату ережелеріне сәйкес келмейтін заңсыз орнатылған конструкциялар анықталуда. Мұндай конструкциялардың иелеріне анықталған бұзушылықтарды жою қажеттігі туралы хабарламалар жіберіледі. Талаптар орындалмаған жағдайда, конструкциялар бұзылады.

«Архитектуралық көріністі бұзып, жаяу жүргіншілер мен көлік қозғалысына кедергі келтіретін, визуалды шу жасайтын нысандарға ерекше көңіл бөлінеді. Бұл жұмыс тұрақты түрде жүргізіліп, күшейтілетін болады», - деп атап өтті басқарма.

Бұл ақпаратты Алматы қаласы сәулет және қала құрылысы басқармасының сайтына сілтеме жасап, ТҮКШ24 жеткізді.

Фото: gov.kz

Ақтөбе облысында әлеуметтік нысандардың жылыту жүйесіне қосылуы 2 қазанға жоспарланған.

Облыстың алдағы жылыту маусымына дайындығы облыс әкімі Асхат Шахаров өткізген кеңесте талқыланды.

Облыстық энергетика және тұрғын үй-коммуналдық шаруашылығы басқармасының басшысы Арысұлан Айтбаевтың айтуынша, күзгі-қысқы кезеңді тұрақты өткізуге қажетті негізгі шаралар орындалған. Жылу, электр, су құбыры және кәріз желілері жұмысқа дайын, қазандықтар мен жабдықтар тексерілген.

Отын мәселесіне ерекше назар аударылған. Бюджеттік ұйымдар тас көмір мен дизель отынымен толық қамтамасыз етілген. Әлеуметтік нысандар қажетіне қорлар жеткілікті. Халық үшін тұрмыстық көмірді жеткізу де тұрақты. Теміржол арқылы кезекті партиялар жеткізіліп, жоспарлы түрде отын сатылауда. Басқарманың ақпараты бойынша, қазіргі таңда көмір тапшылығы жоқ.

Өңірдің негізгі коммуналдық кәсіпорындары жылыту маусымына дайын. Ақтөбе ЖЭО-да негізгі жабдықтар тексерілген, қажетті газ көлемдері қамтамасыз етілген және резервтік отын қарастырылған. Кәсіпорын маусым бойы талап етілетін жылу параметрлерін ұстауға қабілетті.

Aqtobe su-energy group қазандықтар мен жылу желілеріндегі жөндеу жұмыстарын аяқтады. Кәсіпорын тұтынушыларға жылу мен су үздіксіз жеткізілуін қамтамасыз етті. «Энергожүйесі» электр желілері мен құрал-жабдықтарын нормативтік күйде ұстаған, бұл күзгі-қысқы кезеңде электрмен жабдықтаудың сенімділігін қамтамасыз етеді.

Тұрғын үй қоры да жылыту маусымына дайын. Көпқабатты үйлерде ішкі жүйелер, инженерлік желілер мен жабдықтар тексерілген. Нысандарға даярлық төлқұжаттары мен актілері рәсімделген.

Авариялық жағдайларды жою үшін арнайы бригадалар құрылған. Олар техника және қажетті материалдармен қамтамасыз етілген, тәулік бойы кезекшілікте болады.

Осылайша, өңірде жылыту маусымын бастауға қажетті ресурстар бар. 2 қазаннан бастап әлеуметтік нысандарды жылумен қамтамасыз ету басталады. Жылу беруді және жылыту маусымының өтуін тұрақты бақылауда ұстауға тиіс.

«Бастысы – күзгі-қысқы кезеңде тұрғындардың жайлылығын қамтамасыз ету. Барлық коммуналдық қызметтер бірлесіп жұмыс жасап, азаматтардың өтініштеріне жедел жауап беруі керек. Өткенде проблемалар болған учаскелерге ерекше көңіл бөлінуі қажет. Қажетті ресурстардың жоқтығынан адамдардың жылусыз қалуы мүмкін емес. Тиісті ұйымдардың басшылары жағдайды жеке бақылап, қажетті шараларды уақытында қабылдауы тиіс», - деп тапсырды өңір басшысы.

Бұл туралы тұрғын үй-коммуналдық шаруашылық 24 сайты Ақтөбе облысының энергетика және тұрғын үй-коммуналдық шаруашылық басқармасының сайтына сілтеме жасап хабарлайды.

Фото: gov.kz