Алматыда үшінші Эко-Хаб ашылды

Алматы, Жетісу ауданында үшінші Эко-Хаб ашылды. Ол "Таза Қазақстан" қағидаларын қолдана отырып жастарды біріктіреді. Бұл Хаб, жастар саясаты басқармасы, экология және қоршаған ортаны қорғау басқармасы, сондай-ақ "Eco Almaty" компаниясының қолдауымен құрылды. Мұнда қоқысты сұрыптау және қайта өңдеу мәдениеті дамытылады, ағартушылық іс-шаралар өткізіліп, жастардың экологиялық бастамаларына қолдау көрсетіледі.

"Таза Қазақстан" — бұл тек бірреттік акция емес және сенбілікпен шектелмейді. Біздің мақсатымыз – әр адамның қоршаған ортаға жауапкершілікпен қарауды күнделікті өміріне енгізу. Жаңа Эко-Хаб жастарға экологиялық бастамаларды жүзеге асыруға, жаңа идеялар ұсынуға және қаламыздың тазалығына нақты үлес қосуға мүмкіндік береді. Таза қала — әрқайсымыздың жүйелі іс-әрекетімізден басталады", — деп атап өтті Алматы қаласының жастар саясаты басқармасының басшысы Азиз Қажденбек.

Эко-Хаб аумағында қоқысты сұрыптау үшін 10 арнайы контейнер орнатылған. Аудан тұрғындары және жастар пластик, алюминий, қағаз және қайта өңдеуге жарамды басқа да материалдарды тапсыра алады.

Бұл кеңістік тек қайталама шикізатты қабылдау орны ғана болмайды. Мұнда шеберлік сабақтары, кездесулер, экологиялық акциялар және экоактивистер мен еріктілерді біріктіретін басқа іс-шаралар өткізіледі.

Ашылу барысында қатысушыларға экологиялық жүк көлігінің көмегімен пластикалық қалдықтарды қайта өңдеу процесі көрсетілді. Сондай-ақ қайта өңделген материалдардан жасалған тұрмыстық және декоративтік бұйымдар көрмесі ұсынылды.

Сонымен қатар, ECO Network жобасы аясында "Таза Қазақстан — бұл бір күндік акция емес" тақырыбында Евгений Мұхамеджановпен ашық пікірталас өтті. Қатысушылар экологиялық жауапкершілік, қоқысты сұрыптау мәдениеті және жастардың экологиялық жобаларға қатысуы туралы мәселелерді талқылады.

Бүгінгі күнге дейін Алматыда 98-ден астам экологиялық шара өтті, олар 18 мыңнан астам адамды қамтыды. Ірі сенбіліктерге 3,6 мыңнан астам алматылық жастар қатысты.

Жаңа Эко-Хаб экологиялық бастамаларға, ағартушылық іс-шараларға және қоқысты сұрыптауға арналған тұрақты алаңға айналады.

ЖКХ24 сайты Алматы қаласы әкімдігінің сайтына сілтеме жасап хабарлайды.

Фото: gov.kz