Астанада «Таза Қазақстан» экологиялық акциясына студенттер мен ұстаздар қатысуда

Астана қаласының Байқоңыр ауданында республикалық «Таза Қазақстан» экологиялық акциясы аясында қаланы абаттандыру және көгалдандыру шарасы өтті деп хабарлайды Астана қаласы әкімдігінің ресми сайты.

Шара Кенесары көшесінде, №62 және №64 үйлердің жанында өтті. Оған Казпотребсоюздың Жоғары колледжінің студенттері, №16 мектеп ұстаздары, «Ауыл» партиясының өкілдері мен Байқоңыр ауданы әкімінің аппараты қызметкерлері қатысты.

Іс-шара барысында қатысушылар айналадағы аумақты қоқыстан тазартып, ағаштардың айналасындағы топырақты ретке келтіріп, абаттандыру жұмыстарын жүргізді.

«Акция барысында студенттер мен ұстаздар отырғызылған ағаштардың айналасындағы топырақты ретке келтіріп, қоршаған ортаның тазалығын ұстап тұру мен қаланы абаттандыруға өз үлестерін қосты», — деп бөлісті Казпотребсоюз Жоғары колледжінің тәрбие жұмысы жөніндегі директордың орынбасары Акерке Мырзалиева.

Ол мұндай шаралардың тек экологиялық емес, сонымен қатар тәрбиелік маңызы бар екенін атап өтті.

«Мұндай акциялар тек аумақты тазарту емес, сонымен қатар жастардың экологиялық мәдениетін, еңбексүйгіштігін, жауапкершілігін және туған қаласына деген ұқыптылығын қалыптастыратын маңызды тәрбиелік алаң болып табылады. Тазалық әрқайсымыздан басталады. Қоршаған ортадағы тәртіпті сақтау, қоғамдық орындарға ұқыпты қарау және қаланы абаттандыруға өз үлесімізді қосу — біздің ортақ міндетіміз», — деп айтты Акерке Мырзалиева.

«Таза Қазақстан» аясындағы экологиялық акциялар астаналықтардың экологиялық мәдениетін арттыруды, қала ортасын жасылдандыруды және тазалық пен тәртіпті сақтауға бағытталған.

деп хабарлайды ЖКХ24 Астана қаласы әкімдігі сайтына сілтеме жасап.

Фото: gov.kz