Астанада «Таза Қазақстан» экологиялық акциясы өтті

Астанада «Таза Қазақстан» экологиялық акциясы шеңберінде қала аумағын көгалдандыру және абаттандыру жұмыстары жүргізілді. Акцияға қаланың кәсіпорындары да атсалысты. Іс-шара барысында 125 ағаш отырғызылды, деп хабарлайды Астана қаласы әкімдігінің ресми сайты.

Экологиялық бастамаға Индустриалды парк № 1 аумағында орналасқан «Гидрокс» және «KAZTENT SERVICE» компанияларының ұжымдары қатысты. Кәсіпорындардың қызметкерлері көгалдандыру және абаттандыру жұмыстарын белсенділікпен атқарып, қоршаған ортаны жақсартуға өз үлестерін қосуда.

«KAZTENT SERVICE» компаниясы Астанада қаңқалы тенттік бұйымдар өндірісі кешенін салу жобасын жүзеге асыруда. Кәсіпорынның жоспарланған өндірістік қуаты жылына 60 мың шаршы метр тент өнімін құрайды.

«Гидрокс» компаниясы жылына 14,4 мың тонна сұйық күйдіргіш натрий өндіретін зауыттың құрылысын жүзеге асыруда.

«Таза Қазақстан» акциясы аясындағы мұндай іс-шаралар кәсіпорындарды қаладағы көгалдандыру және абаттандыруға тартуға, экологиялық жауапкершілікті арттыруға және жайлы, таза қалалық ортаны қалыптастыруға бағытталған.

Фото: gov.kz